qalam ko mustaid-e-hubb-e-jah likh lije

qalam ko musta.id-e-hubb-e-jāh likh liije

mire gunāhoñ meñ aur ik gunāh likh liije

mirā ḳhayāl thā ham koh-e-rūh sar karte

badal ke hijje ise aap kaah likh liije

buland imāratoñ meñ bas ga.ī hai vīrānī

diloñ meñ chāheñ to shahr-e-tabāh likh liije

is aañkh meñ koī manzar rahā na ḳhvāb rahā

ab is ke baa'd bhī is ko nigāh likh liije

kitāb-e-haq meñ zamīñ milkiyat hai allah kī

arab meñ milkiyat-e-bādshah likh liije

dabā.e baiThe haiñ hoñToñ meñ jis ko mimbar par

qalam ke lab pe use sard aah likh liije

baḌā azaab to har qaum par zarūrī nahīñ

ik aah ko nafas-e-intibāh likh liije

ye ḳhushk pattiyāñ āñchal haiñ kahkashāñ kā miyāñ

harī zamīñ pe hai is ko gayāh likh liije

kisī bhī sinf meñ zehn aap kā chale na chale

qalam hai haath meñ bas ḳhvā-maḳhvāh likh liije

unheñ to guftugū karne meñ bhī takalluf hai

magar musir haiñ use rasm-o-rāh likh liije

dukhoñ kī gintī se kaalī hai zindagī kī kitāb

to jantarī meñ unheñ sāl-o-māh likh liije

qalam ko mustaid-e-hubb-e-jah likh lije

mere gunahon mein aur ek gunah likh lije

mera KHayal tha hum koh-e-ruh sar karte

badal ke hijje ise aap kah likh lije

buland imaraton mein bas gai hai virani

dilon mein chahen to shahr-e-tabah likh lije

is aankh mein koi manzar raha na KHwab raha

ab is ke ba'd bhi is ko nigah likh lije

kitab-e-haq mein zamin milkiyat hai allah ki

arab mein milkiyat-e-baadshah likh lije

dabae baiThe hain honTon mein jis ko mimbar par

qalam ke lab pe use sard aah likh lije

baDa azab to har qaum par zaruri nahin

ek aah ko nafas-e-intibah likh lije

ye KHushk pattiyan aanchal hain kahkashan ka miyan

hari zamin pe hai is ko gayah likh lije

kisi bhi sinf mein zehn aap ka chale na chale

qalam hai hath mein bas KHwa-maKHwah likh lije

unhen to guftugu karne mein bhi takalluf hai

magar musir hain use rasm-o-rah likh lije

dukhon ki ginti se kali hai zindagi ki kitab

to jantari mein unhen sal-o-mah likh lije