qalam mein ashk bhar kar likh rahi hun dard kaghaz par

qalam meñ ashk bhar kar likh rahī huuñ dard kāġhaz par

bikhere jā rahī huuñ hasratoñ ko sard kāġhaz par

taḌap aurat ke dil kī sirf ik aurat samajhtī hai

bas apnī ḳhvāhishoñ ko likh rahe haiñ mard kāġhaz par

chalo maanā ki kah lene se dukh halkā hī hotā hai

magar kuchh hī paloñ meñ itnā saarā dard kāġhaz par

yūñhī bas aaj maiñ ne ik purānī Diary kholī

jamī thī kab se yādoñ kī purānī gard kāġhaz par

nisā.ī karb likhne kā hunar ham ko hī aatā hai

hukūmat apnī sābit kar rahe haiñ mard kāġhaz par

tabhī jā kar ġhazal ko ik na.e paikar meñ Dhālā hai

lahū kī surḳh būñdeñ jab girī hai zard kāġhaz par

namī se gal bhī sakte haiñ sharar se jal bhī sakte haiñ

bharosā kar rahī haiñ kyoñ 'siyā' be-dard kāġhaz par

qalam mein ashk bhar kar likh rahi hun dard kaghaz par

bikhere ja rahi hun hasraton ko sard kaghaz par

taDap aurat ke dil ki sirf ek aurat samajhti hai

bas apni KHwahishon ko likh rahe hain mard kaghaz par

chalo mana ki kah lene se dukh halka hi hota hai

magar kuchh hi palon mein itna sara dard kaghaz par

yunhi bas aaj main ne ek purani Diary kholi

jami thi kab se yaadon ki purani gard kaghaz par

nisai karb likhne ka hunar hum ko hi aata hai

hukumat apni sabit kar rahe hain mard kaghaz par

tabhi ja kar ghazal ko ek nae paikar mein Dhaala hai

lahu ki surKH bunden jab giri hai zard kaghaz par

nami se gal bhi sakte hain sharar se jal bhi sakte hain

bharosa kar rahi hain kyon 'siya' be-dard kaghaz par