qalb-e-alam-nasib ki tishna-labi bujhae ja

qalb-e-alam-nasīb kī tishna-labī bujhā.e jā

ai mere sāqiyā mujhe shām-o-sahar pilā.e jā

ai dil-e-be-qarār sun rone se fā.eda hai kyā

jis ne bhulā diyā tujhe tū bhī use bhulā.e jā

barsar-e-bām aa ke tū parda-e-ruḳh haTā zarā

ham bhī haiñ sāhib-e-nazar ham ko bhī āzmā.e jā

zauq-e-tulū-e-sub.h bhī degī ye tīrgī tujhe

raat tavīl hai to kyā dil kā diyā jalā.e jā

jān-e-bahār-e-gulsitāñ zohra-jamāl nāznīñ

'nayyar'-e-ḳhush-ḳhayāl ke fikr-o-nazar pe chhā.e jā

qalb-e-alam-nasib ki tishna-labi bujhae ja

ai mere saqiya mujhe sham-o-sahar pilae ja

ai dil-e-be-qarar sun rone se faeda hai kya

jis ne bhula diya tujhe tu bhi use bhulae ja

barsar-e-baam aa ke tu parda-e-ruKH haTa zara

hum bhi hain sahib-e-nazar hum ko bhi aazmae ja

zauq-e-tulu-e-subh bhi degi ye tirgi tujhe

raat tawil hai to kya dil ka diya jalae ja

jaan-e-bahaar-e-gulsitan zohra-jamal naznin

'nayyar'-e-KHush-KHayal ke fikr-o-nazar pe chhae ja