qamar bhi dur na tha kahkashan buland na thi

qamar bhī duur na thā kahkashāñ buland na thī

hamīñ ko farsh se duurī magar pasand na thī

zarā sī ātish-e-ġham se chaTaḳh ke bujh jaatī

mirī hayāt-e-junūñ dāna-e-sipand na thī

lahū zamīñ ke shagāfoñ se be-sabab phūTā

falak kī aañkh abhī mā.il-e-gazand na thī

yahī ki paas thā taqdīs-e-bām kā varna

talab ke haath meñ kyā shauq kī kamand na thī

hamāre haal pe ahl-e-jahāñ ke hoñToñ par

hañsī na thī koī aisī jo zahr-ḳhand na thī

shaguft-e-gul kī sadā ho ki girya-e-shabnam

jahāñ meñ kaun sī āvāz thī jo pand na thī

fareb de ga.ī aalam ko ḳhū-e-tanhā.ī

mire junūñ kī tabī.at to ḳhud-pasand na thī

ziyāñ thā naaz mata-e-hunar pe ai 'manzūr'

ye chiiz chashm-e-zamāna meñ arjumand na thī

qamar bhi dur na tha kahkashan buland na thi

hamin ko farsh se duri magar pasand na thi

zara si aatish-e-gham se chaTaKH ke bujh jati

meri hayat-e-junun dana-e-sipand na thi

lahu zamin ke shagafon se be-sabab phuTa

falak ki aankh abhi mail-e-gazand na thi

yahi ki pas tha taqdis-e-baam ka warna

talab ke hath mein kya shauq ki kamand na thi

hamare haal pe ahl-e-jahan ke honTon par

hansi na thi koi aisi jo zahr-KHand na thi

shaguft-e-gul ki sada ho ki girya-e-shabnam

jahan mein kaun si aawaz thi jo pand na thi

fareb de gai aalam ko KHu-e-tanhai

mere junun ki tabiat to KHud-pasand na thi

ziyan tha naz mata-e-hunar pe ai 'manzur'

ye chiz chashm-e-zamana mein arjumand na thi