قرار جاں بھی تمہی اضطراب جاں بھی تمہی

قرار جاں بھی تمہی اضطراب جاں بھی تمہی

مرا یقیں بھی تمہی ہو مرا گماں بھی تمہی

تمہاری جان ہے نکہت تمہارا جسم بہار

مری غزل بھی تمہی میری داستاں بھی تمہی

یہ کیا طلسم ہے دریا میں بن کے عکس قمر

رکے ہوئے بھی تمہی ہو رواں دواں بھی تمہی

خدا کا شکر مرا راستہ معین ہے

کہ کارواں بھی تمہی میر کارواں بھی تمہی

تمہی ہو جس سے ملی مجھ کو شان استغنا

کہ میرا غم بھی تمہی غم کے رازداں بھی تمہی

نہاں ہو ذہن میں وجدان کا دھواں بن کر

افق پہ منزل ادراک کا نشاں بھی تمہی

تمام حسن عمل ہوں تمام حسن بیاں

کہ میرا دل بھی تمہی ہو مری زباں بھی تمہی