qarar kho ke mila ye waqar thoDa sa

qarār kho ke milā ye vaqār thoḌā sā

vo sang-dil bhī huā ashk-bār thoḌā sā

kisī ke jalve nigāhoñ meñ jazb kar letā

dam-e-nazāra jo miltā qarār thoḌā sā

kiyā kalīm ko armān-e-dīd ne rusvā

dikhā ke jalva-e-parvardigār thoḌā sā

maiñ aaj vāqif-e-asrār ho gayā saaqī

zarā sī pī ke jo aaya ḳhumār thoḌā sā

tamām ābla-pā.ī kī shaan miT jaatī

kahīñ bhī chubh gayā hotā jo ḳhaar thoḌā sā

baḌe pate kī batā.ūñ baḌe maze kī kahūñ

jo aap mujh pe kareñ e.atibār thoḌā sā

kisī kī yaad ba-hangām-e-naza.a kahtī hai

ḳhudā ke vāste aur intizār thoḌā sā

vahīñ kahīñ mujhe saaqī zarā pilā denā

jahāñ kahīñ ho nashe kā utaar thoḌā sā

jo dekhtā hai mirī be-qarāriyāñ 'shabbīr'

usī ko dekhtā huuñ be-qarār thoḌā sā

qarar kho ke mila ye waqar thoDa sa

wo sang-dil bhi hua ashk-bar thoDa sa

kisi ke jalwe nigahon mein jazb kar leta

dam-e-nazara jo milta qarar thoDa sa

kiya kalim ko arman-e-did ne ruswa

dikha ke jalwa-e-parwardigar thoDa sa

main aaj waqif-e-asrar ho gaya saqi

zara si pi ke jo aaya KHumar thoDa sa

tamam aabla-pai ki shan miT jati

kahin bhi chubh gaya hota jo KHar thoDa sa

baDe pate ki bataun baDe maze ki kahun

jo aap mujh pe karen eatibar thoDa sa

kisi ki yaad ba-hangam-e-naza kahti hai

KHuda ke waste aur intizar thoDa sa

wahin kahin mujhe saqi zara pila dena

jahan kahin ho nashe ka utar thoDa sa

jo dekhta hai meri be-qarariyan 'shabbir'

usi ko dekhta hun be-qarar thoDa sa