قریب آ تو سہی اے غزال شب میرے

قریب آ تو سہی اے غزال شب میرے

ترے دکھوں کا مداوا کریں گے لب میرے

گلی گلی سے ابھرتی رہی ملال کی چاپ

تو ڈوب ڈوب گیا نغمۂ طرب میرے

گھرا ہوا تھا عجب کم شناس لوگوں میں

کڈھب دکھائی دئے ہر کسی کو ڈھب میرے

اگرچہ میرے لبوں پر لگی ہے مہر سکوت

مکالمے ہیں تری یاد سے عجب میرے

انہی کے فیض سے پائی ہے صبر کی تعلیم

ادیب نکلے تلامیذ بے ادب میرے

یہ پہلے پیار کی بارش یہ بھیگنے کا مزا

ٹپک پڑا تو کہاں رنج بے طلب میرے

میں روشنی کے قبیلے کا فرد ہوں یاورؔ

یہ چاند اور ستارے ہیں ہم نسب میرے