qarib aa to sahi ai ghazal-e-shab mere

qarīb aa to sahī ai ġhazāl-e-shab mere

tire dukhoñ kā mudāvā kareñge lab mere

galī galī se ubhartī rahī malāl kī chaap

tū Duub Duub gayā naġhma-e-tarab mere

ghirā huā thā 'ajab kam-shanās logoñ meñ

kuDhab dikhā.ī diye har kisī ko Dhab mere

agarche mere laboñ par lagī hai mohr-e-sukūt

mukālme haiñ tirī yaad se 'ajab mere

unhī ke faiz se paa.ī hai sabr kī tā'līm

adiib nikle talāmīz-e-be-adab mere

ye pahle pyaar kī bārish ye bhīgne kā mazā

Tapak paḌā tū kahāñ ranj-e-be-talab mere

maiñ raushnī ke qabīle kā fard huuñ 'yāvar'

ye chāñd aur sitāre haiñ ham-nasab mere

qarib aa to sahi ai ghazal-e-shab mere

tere dukhon ka mudawa karenge lab mere

gali gali se ubharti rahi malal ki chap

tu Dub Dub gaya naghma-e-tarab mere

ghira hua tha 'ajab kam-shanas logon mein

kuDhab dikhai diye har kisi ko Dhab mere

agarche mere labon par lagi hai mohr-e-sukut

mukalme hain teri yaad se 'ajab mere

unhi ke faiz se pai hai sabr ki ta'lim

adib nikle talamiz-e-be-adab mere

ye pahle pyar ki barish ye bhigne ka maza

Tapak paDa tu kahan ranj-e-be-talab mere

main raushni ke qabile ka fard hun 'yawar'

ye chand aur sitare hain ham-nasab mere