qarib-e-wasl koi hadsa na ho jae

qarīb-e-vasl koī hādsa na ho jaa.e

kahīñ badan kī tamāzat fanā na ho jaa.e

yahī hai ḳhauf ki tujh paas ho ke bhī merī

ragoñ kā surḳh lahū mushtaba na ho jaa.e

jibillatoñ kā taqāzā ki tujh ko pahneñ ham

magar vo zaḳhm-e-tamannā harā na ho jaa.e

khile haiñ phuul sitāroñ ke ḳhush-gavār hai rut

qarīb aao ki mausam ḳhafā na ho jaa.e

lahū meñ tairtī añgḌā.iyoñ se bair na kar

shab-e-visāl junūñ sāneha na ho jaa.e

tarāshne meñ sukūñ thā magar maiñ Dartā huuñ

kahīñ ye aks-e-shagufta ḳhudā na ho jaa.e

qarib-e-wasl koi hadsa na ho jae

kahin badan ki tamazat fana na ho jae

yahi hai KHauf ki tujh pas ho ke bhi meri

ragon ka surKH lahu mushtaba na ho jae

jibillaton ka taqaza ki tujh ko pahnen hum

magar wo zaKHm-e-tamanna hara na ho jae

khile hain phul sitaron ke KHush-gawar hai rut

qarib aao ki mausam KHafa na ho jae

lahu mein tairti angDaiyon se bair na kar

shab-e-visal junun saneha na ho jae

tarashne mein sukun tha magar main Darta hun

kahin ye aks-e-shagufta KHuda na ho jae