قریب وصل کوئی حادثہ نہ ہو جائے

قریب وصل کوئی حادثہ نہ ہو جائے

کہیں بدن کی تمازت فنا نہ ہو جائے

یہی ہے خوف کہ تجھ پاس ہو کے بھی میری

رگوں کا سرخ لہو مشتبہ نہ ہو جائے

جبلتوں کا تقاضا کہ تجھ کو پہنیں ہم

مگر وہ زخم تمنا ہرا نہ ہو جائے

کھلے ہیں پھول ستاروں کے خوش گوار ہے رت

قریب آؤ کہ موسم خفا نہ ہو جائے

لہو میں تیرتی انگڑائیوں سے بیر نہ کر

شب وصال جنوں سانحہ نہ ہو جائے

تراشنے میں سکوں تھا مگر میں ڈرتا ہوں

کہیں یہ عکس شگفتہ خدا نہ ہو جائے