qarib tum ho to har ek se dosti si lage

qarīb tum ho to har ik se dostī sī lage

jo tum ho duur to zaat apnī ajnabī sī lage

ḳhudā hī jaane hayāt apnī kis tarah guzre

baġhair un ke to ik pal bhī ik sadī sī lage

tum apnā kah ke pukāro kabhī to bhūle se

ye zindagī kabhī ham ko bhī zindagī sī lage

navāzishāt kā tālib nahīñ huuñ maiñ lekin

ab is tarah bhī na mil jis se be-ruḳhī sī lage

na pūchh kaifiyat-e-intizār ai hamdam

ki tez dhuup bhī is vaqt chāñdnī sī lage

ḳhushī to apne muqaddar meñ hī nahīñ 'dānish'

kisī ke ġham kī ye daulat bhī 'ārzī sī lage

qarib tum ho to har ek se dosti si lage

jo tum ho dur to zat apni ajnabi si lage

KHuda hi jaane hayat apni kis tarah guzre

baghair un ke to ek pal bhi ek sadi si lage

tum apna kah ke pukaro kabhi to bhule se

ye zindagi kabhi hum ko bhi zindagi si lage

nawazishat ka talib nahin hun main lekin

ab is tarah bhi na mil jis se be-ruKHi si lage

na puchh kaifiyat-e-intizar ai hamdam

ki tez dhup bhi is waqt chandni si lage

KHushi to apne muqaddar mein hi nahin 'danish'

kisi ke gham ki ye daulat bhi 'arzi si lage