qarnon purana waqt ko lalkarta hua

qarnoñ purānā vaqt ko lalkārtā huā

ik shahr hai hamāre bhī andar basā huā

suljhā rahā thā arz-o-samā kī vo gutthiyāñ sabhī

sab ke liye ḳhud ek mo'amma banā huā

shāyad nizām-e-shamsī ke siine kā ḳhvāb thā

maiñ dekhtā rahā jise āñkheñ banā huā

ab us ko āftāb meñ Dhalne kā hukm do

ik ashk-e-ġham hai nok-e-mizha par khaḌā huā

ḳhud meñ na jazb kar luuñ kahīñ terī zaat ko

sar-tā-qadam maiñ zauq-e-talab meñ rachā huā

phir chhā rahā hai zehn par ik saaya dosto

sab kuchh sameTtā huā ḳhud phailtā huā

tanhā tumhīñ to markaz-e-asrār-e-dil na the

maiñ bhī vahīñ kahīñ thā tumheñ dekhtā huā

rūheñ na jaane kaun sī duniyā meñ kho ga.iiñ

ik jism chīḳhtā hai saḌak par paḌā huā

kab tak rahūñ hazār jahāñ-dar-jahāñ liye

maiñ darmiyāñ azal aur abad ke khaḌā huā

ummīd koī harf-o-hikāyat se thī kise

lekin nigāh-e-nāz tujhe bhī ye kyā huā

āñkhoñ meñ aa ke jaan khaḌī dekhtī rahī

hāthoñ se dāman-e-ġham-e-dil chhūTtā huā

'hairat' kahāñ the dast-ba-dil dekhte hue''

bārish meñ bhīgtā huā sho'la banā huā

qarnon purana waqt ko lalkarta hua

ek shahr hai hamare bhi andar basa hua

suljha raha tha arz-o-sama ki wo gutthiyan sabhi

sab ke liye KHud ek mo'amma bana hua

shayad nizam-e-shamsi ke sine ka KHwab tha

main dekhta raha jise aankhen bana hua

ab us ko aaftab mein Dhalne ka hukm do

ek ashk-e-gham hai nok-e-mizha par khaDa hua

KHud mein na jazb kar lun kahin teri zat ko

sar-ta-qadam main zauq-e-talab mein racha hua

phir chha raha hai zehn par ek saya dosto

sab kuchh sameTta hua KHud phailta hua

tanha tumhin to markaz-e-asrar-e-dil na the

main bhi wahin kahin tha tumhein dekhta hua

ruhen na jaane kaun si duniya mein kho gain

ek jism chiKHta hai saDak par paDa hua

kab tak rahun hazar jahan-dar-jahan liye

main darmiyan azal aur abad ke khaDa hua

ummid koi harf-o-hikayat se thi kise

lekin nigah-e-naz tujhe bhi ye kya hua

aankhon mein aa ke jaan khaDi dekhti rahi

hathon se daman-e-gham-e-dil chhuTta hua

'hairat' kahan the dast-ba-dil dekhte hue

barish mein bhigta hua sho'la bana hua