qarya-e-hairat mein dil ka mustaqar ek KHwab hai

qarya-e-hairat meñ dil kā mustaqar ik ḳhvāb hai

ye zamīñ ik aa.ina hai ye nagar ik ḳhvāb hai

tañgī-e-auqāt se khultī hai ik rāh-e-najāt

vus.at-e-imroz-o-fardā se udhar ik ḳhvāb hai

ek sub.h-e-nūr hai mere sitāre kī niyām

aur mirī be-teġh āñkhoñ kī sipar ik ḳhvāb hai

ye zamīn-o-āsmāñ donoñ haqīqat haiñ magar

ḳhaak par maujūd hone kī ḳhabar ik ḳhvāb hai

saañs ruktā hai to gul hotī hai sham-e-justujū

raat bhar bedār rahne kā samar ik ḳhvāb hai

ek mauj-e-āb hai ik aks meñ lipTī huī

ek mauj-e-rañg se shīr-o-shakar ik ḳhvāb hai

qarya-e-hairat mein dil ka mustaqar ek KHwab hai

ye zamin ek aaina hai ye nagar ek KHwab hai

tangi-e-auqat se khulti hai ek rah-e-najat

wusat-e-imroz-o-farda se udhar ek KHwab hai

ek subh-e-nur hai mere sitare ki niyam

aur meri be-tegh aankhon ki sipar ek KHwab hai

ye zamin-o-asman donon haqiqat hain magar

KHak par maujud hone ki KHabar ek KHwab hai

sans rukta hai to gul hoti hai sham-e-justuju

raat bhar bedar rahne ka samar ek KHwab hai

ek mauj-e-ab hai ek aks mein lipTi hui

ek mauj-e-rang se shir-o-shakar ek KHwab hai