qarya-e-wahm-o-guman tak aae

qarya-e-vahm-o-gumāñ tak aa.e

ham tire saath kahāñ tak aa.e

apnī kam-zarfī kā iz.hār karūñ

rāz-e-sar-basta zabāñ tak aa.e

baat kar dī to pashemānī kyā

tiir vāpas na kamāñ tak aa.e

pyaas jo apnī bujhānā chāhe

halqa-e-tishna-labāñ tak aa.e

abhī jaarī hai nahīñ kī gardān

dekhiye kaise vo haañ tak aa.e

mutma.in phirte haiñ yuuñ sahrā meñ

jaise ham āb-e-ravāñ tak aa.e

ham bahāroñ kī talab meñ 'nāsir'

āḳhirash shahr-e-ḳhizāñ tak aa.e

qarya-e-wahm-o-guman tak aae

hum tere sath kahan tak aae

apni kam-zarfi ka izhaar karun

raaz-e-sar-basta zaban tak aae

baat kar di to pashemani kya

tir wapas na kaman tak aae

pyas jo apni bujhana chahe

halqa-e-tishna-laban tak aae

abhi jari hai nahin ki gardan

dekhiye kaise wo han tak aae

mutmain phirte hain yun sahra mein

jaise hum aab-e-rawan tak aae

hum bahaaron ki talab mein 'nasir'

aaKHirash shahr-e-KHizan tak aae