قصداً بھی اس نے ہنس کے جفا کو وفا پڑھا

قصداً بھی اس نے ہنس کے جفا کو وفا پڑھا

شوخی تو دیکھیے کہ لکھا کیا تھا کیا پڑھا

اے عشق ہم نے تیرا سبق دل سے کیا پڑھا

ایسا پڑھا کہ بھول گئے سب لکھا پڑھا

کیا لکھتے وہ جواب میں افسوس کے سوا

اک کم پڑھے نے خط میں فضا کو قضا پڑھا

اے نامہ بر میں بھیج تو دوں اپنا خط انہیں

پھر تیرا کیا بنے گا اگر مدعا پڑھا

تھی کتنی ایک مست کو اللہ سے لگن

سو بار اس نے لفظ جدا کو خدا پڑھا

شبرؔ تری تلاش بھی کتنی عجیب ہے

تو نے نئی ردیف میں ہر قافیا پڑھا