qasdan bhi usne hans ke jafa ko wafa paDha

qasdan bhī us ne hañs ke jafā ko vafā paḌhā

shoḳhī to dekhiye ki likhā kyā thā kyā paḌhā

ai ishq ham ne terā sabaq dil se kyā paḌhā

aisā paḌhā ki bhuul ga.e sab likhā paḌhā

kyā likhte vo javāb meñ afsos ke sivā

ik kam-paḌhe ne ḳhat meñ fazā ko qazā paḌhā

ai nāma-bar maiñ bhej to duuñ apnā ḳhat unheñ

phir terā kyā banegā agar mudda.ā paḌhā

thī kitnī ek mast ko allāh se lagan

sau baar us ne lafz-e-judā ko ḳhudā paḌhā

'shabbar' tirī talāsh bhī kitnī ajiib hai

tū ne na.ī radīf meñ har qāfiyā paḌhā

qasdan bhi us ne hans ke jafa ko wafa paDha

shoKHi to dekhiye ki likha kya tha kya paDha

ai ishq hum ne tera sabaq dil se kya paDha

aisa paDha ki bhul gae sab likha paDha

kya likhte wo jawab mein afsos ke siwa

ek kam-paDhe ne KHat mein faza ko qaza paDha

ai nama-bar main bhej to dun apna KHat unhen

phir tera kya banega agar muddaa paDha

thi kitni ek mast ko allah se lagan

sau bar us ne lafz-e-juda ko KHuda paDha

'shabbar' teri talash bhi kitni ajib hai

tu ne nai radif mein har qafiya paDha