qasida tujhse ghazal tujhse marsiya tujhse

qasīda tujh se ġhazal tujh se marsiya tujh se

har ek harf huā sāhab-e-navā tujh se

zabāñ-kushā.ī-e-ġham se khulī kitāb-e-ḳhayāl

varaq varaq pe khulā husn-e-mudda.ā tujh se

zamīñ meñ phuuT paḌā chashma-e-junūñ-sāmāñ

guloñ meñ sard paḌī ātish-qabā tujh se

kahāñ se zūd-farāmoshiyoñ kī ḳhū sīkhī

jo dekhiye to na thī barq-āshnā tujh se

pahuñch to jaatā sar-e-ḳhema-e-vafā-ābād

magar hai sust qadam umr-e-tez-pā tujh se

kiye the kaam jo dil ke sipurd un ko bhī

dimāġh-e-dahr se baḌh kar hai ab gila tujh se

huā jo kūcha-e-tanqīd meñ 'hasan' rusvā

milāyā ġhaib ne 'ġhālib' kā silsila tujh se

qasida tujh se ghazal tujh se marsiya tujh se

har ek harf hua sahab-e-nawa tujh se

zaban-kushai-e-gham se khuli kitab-e-KHayal

waraq waraq pe khula husn-e-muddaa tujh se

zamin mein phuT paDa chashma-e-junun-saman

gulon mein sard paDi aatish-qaba tujh se

kahan se zud-faramoshiyon ki KHu sikhi

jo dekhiye to na thi barq-ashna tujh se

pahunch to jata sar-e-KHema-e-wafa-abaad

magar hai sust qadam umr-e-tez-pa tujh se

kiye the kaam jo dil ke sipurd un ko bhi

dimagh-e-dahr se baDh kar hai ab gila tujh se

hua jo kucha-e-tanqid mein 'hasan' ruswa

milaya ghaib ne 'ghaalib' ka silsila tujh se