qasr-e-rangin se guzar bagh-o-gulistan se nikal

qasr-e-rañgīñ se guzar bāġh-o-gulistāñ se nikal

hai vafā-pesha tū mat kūcha-e-jānāñ se nikal

nik.hat-e-zulf ye kis kī hai ki jis ke aage

huī ḳhajlat-zada bū sumbul-o-raihāñ se nikal

go bahār ab hai vale roz-e-ḳhizāñ ai bulbul

yak-qalam nargis o gul jāveñge bustāñ se nikal

imtihāñ karne ko yuuñ dil se kahā ham ne raat

ai dil-e-ġham-zada is kākul-e-pechāñ se nikal

khā ke sau pech kahā maiñ to nikalne kā nahīñ

magar ai dushman-e-jāñ chal tū mire haañ se nikal

ho pareshānī se jis kī mujhe sau jam.iyyat

kis tarah jā.ūñ maiñ us zulf-e-pareshāñ se nikal

laakh zindān-e-pur-āfāt meñ hotā hai vo qaid

jo koī jaatā hai is taur ke zindāñ se nikal

mujh se mumkin nahīñ mahbūb kī qat.a-e-ulfat

garche maiñ jā.ūñgā is ālam-e-imkāñ se nikal

chaah meñ mujh ko ye murshid kā hai irshād 'nazīr'

aabrū chāhe to mat chāh-e-zanaḳhdāñ se nikal

qasr-e-rangin se guzar bagh-o-gulistan se nikal

hai wafa-pesha tu mat kucha-e-jaanan se nikal

nikhat-e-zulf ye kis ki hai ki jis ke aage

hui KHajlat-zada bu sumbul-o-raihan se nikal

go bahaar ab hai wale roz-e-KHizan ai bulbul

yak-qalam nargis o gul jawenge bustan se nikal

imtihan karne ko yun dil se kaha hum ne raat

ai dil-e-gham-zada is kakul-e-pechan se nikal

kha ke sau pech kaha main to nikalne ka nahin

magar ai dushman-e-jaan chal tu mere han se nikal

ho pareshani se jis ki mujhe sau jamiyyat

kis tarah jaun main us zulf-e-pareshan se nikal

lakh zindan-e-pur-afat mein hota hai wo qaid

jo koi jata hai is taur ke zindan se nikal

mujh se mumkin nahin mahbub ki qata-e-ulfat

garche main jaunga is aalam-e-imkan se nikal

chah mein mujh ko ye murshid ka hai irshad 'nazir'

aabru chahe to mat chah-e-zanaKHdan se nikal