قطع ہوئی زبان شوق ذکر وصال آ گیا

قطع ہوئی زبان شوق ذکر وصال آ گیا

عالم اضطراب میں لب پہ سوال آ گیا

اشک تڑپ کے رہ گیا آہ لبوں پہ رک گئی

کیا کسی پردہ دار کا دل میں خیال آ گیا

جلنے لگی نقاب حسن کوند گئیں وہ بجلیاں

آئنۂ جمال میں رنگ جلال آ گیا

راز الست کہہ دیا موج نسیم صبح نے

وجد میں پھول گر پڑے شاخوں کو حال آ گیا

دشمن ہوش بن گیا حسن طلب نگاہ کا

آپ کی جلوہ گاہ میں دل کا سوال آ گیا

وحشت دل نے کر دیا غم کی طرف سے بے نیاز

جوش جنوں میں زیر پا کوہ ملال آ گیا

داد سخن ہے ناگوار محو سکوت ہیں حریف

ثاقبؔ خوش بیاں میں کیا رنگ کمال آ گیا