qata hui zaban-e-shauq zikr-e-visal aa gaya

qat.a huī zabān-e-shauq zikr-e-visāl aa gayā

ālam-e-iztirāb meñ lab pe savāl aa gayā

ashk taḌap ke rah gayā aah laboñ pe ruk ga.ī

kyā kisī parda-dār kā dil meñ ḳhayāl aa gayā

jalne lagī naqāb-e-husn kauñd ga.iiñ vo bijliyāñ

ā.ina-e-jamāl meñ rañg-e-jalāl aa gayā

rāz-e-alast kah diyā mauj-e-nasīm-e-sub.h ne

vajd meñ phuul gir paḌe shāḳhoñ ko haal aa gayā

dushman-e-hosh ban gayā husn-e-talab nigāh kā

aap kī jalva-gāh meñ dil kā savāl aa gayā

vahshat-e-dil ne kar diyā ġham kī taraf se be-niyāz

josh-e-junūñ meñ zer-e-pā koh-e-malāl aa gayā

dād-e-suḳhan hai nāgavār mahv-e-sukūt haiñ harīf

'sāqib'-e-ḳhush-bayāñ meñ kyā rang-e-kamāl aa gayā

qata hui zaban-e-shauq zikr-e-visal aa gaya

aalam-e-iztirab mein lab pe sawal aa gaya

ashk taDap ke rah gaya aah labon pe ruk gai

kya kisi parda-dar ka dil mein KHayal aa gaya

jalne lagi naqab-e-husn kaund gain wo bijliyan

aaina-e-jamal mein rang-e-jalal aa gaya

raaz-e-alast kah diya mauj-e-nasim-e-subh ne

wajd mein phul gir paDe shaKHon ko haal aa gaya

dushman-e-hosh ban gaya husn-e-talab nigah ka

aap ki jalwa-gah mein dil ka sawal aa gaya

wahshat-e-dil ne kar diya gham ki taraf se be-niyaz

josh-e-junun mein zer-e-pa koh-e-malal aa gaya

dad-e-suKHan hai nagawar mahw-e-sukut hain harif

'saqib'-e-KHush-bayan mein kya rang-e-kamal aa gaya