qatl-e-ashiq kisi mashuq se kuchh dur na tha

qatl-e-āshiq kisī ma.ashūq se kuchh duur na thā

par tire ahd se aage to ye dastūr na thā

raat majlis meñ tire husn ke sho.ale ke huzūr

sham.a ke muñh pe jo dekhā to kahīñ nuur na thā

zikr merā hī vo kartā thā sarīhan lekin

maiñ ne pūchhā to kahā ḳhair ye mazkūr na thā

bāvajūde ki par-o-bāl na the aadam ke

vahāñ pahuñchā ki farishte kā bhī maqdūr na thā

parvarish ġham kī tire yaañ ta.iiñ to kī dekhā

koī bhī daaġh thā siine meñ ki nāsūr na thā

mohtasib aaj to mai-ḳhāne meñ tere hāthoñ

dil na thā koī ki shīshe kī tarah chuur na thā

'dard' ke milne se ai yaar burā kyuuñ maanā

us ko kuchh aur sivā diid ke manzūr na thā

qatl-e-ashiq kisi mashuq se kuchh dur na tha

par tere ahd se aage to ye dastur na tha

raat majlis mein tere husn ke shoale ke huzur

shama ke munh pe jo dekha to kahin nur na tha

zikr mera hi wo karta tha sarihan lekin

main ne puchha to kaha KHair ye mazkur na tha

bawajude ki par-o-baal na the aadam ke

wahan pahuncha ki farishte ka bhi maqdur na tha

parwarish gham ki tere yan tain to ki dekha

koi bhi dagh tha sine mein ki nasur na tha

mohtasib aaj to mai-KHane mein tere hathon

dil na tha koi ki shishe ki tarah chur na tha

'dard' ke milne se ai yar bura kyun mana

us ko kuchh aur siwa did ke manzur na tha