qatl hone KHud hi qatil ke makan tak aa gae

qatl hone ḳhud hī qātil ke makāñ tak aa ga.e

zindagī kī justujū meñ ham kahāñ tak aa ga.e

maiñ ne kuchh māñgā nahīñ tere sivā allāh se

ik du'ā ke badle sātoñ āsmāñ tak aa ga.e

ham zabāñ rakhte hue bhī be-zabāñ haiñ shahr meñ

kapkapāte lafz gūñgī dāstāñ tak aa ga.e

muskurātī chāñdnī kā jism niilā ho gayā

dhuup ke zahrīle paañv sā.ebāñ tak aa ga.e

kam se kam dastār to rahne de sar par muflisī

ghar ke saare raaz bachchoñ kī zabāñ tak aa ga.e

ab buzurgoñ kī nasīhat yaad aatī hai hameñ

phuul chunte chunte shahr-e-saḳht-jāñ tak aa ga.e

muskurātī bhuuk aur aañsū bharī āñkheñ liye

lauT kar mazdūr maġhrib kī azaañ tak aa ga.e

mere hāthoñ meñ abhī tak dostī kā lams hai

dostoñ ke haath meñ tīr-o-kamāñ tak aa ga.e

qatl hone KHud hi qatil ke makan tak aa gae

zindagi ki justuju mein hum kahan tak aa gae

main ne kuchh manga nahin tere siwa allah se

ek du'a ke badle saton aasman tak aa gae

hum zaban rakhte hue bhi be-zaban hain shahr mein

kapkapate lafz gungi dastan tak aa gae

muskuraati chandni ka jism nila ho gaya

dhup ke zahrile panw saeban tak aa gae

kam se kam dastar to rahne de sar par muflisi

ghar ke sare raaz bachchon ki zaban tak aa gae

ab buzurgon ki nasihat yaad aati hai hamein

phul chunte chunte shahr-e-saKHt-jaan tak aa gae

muskuraati bhuk aur aansu bhari aankhen liye

lauT kar mazdur maghrib ki azan tak aa gae

mere hathon mein abhi tak dosti ka lams hai

doston ke hath mein tir-o-kaman tak aa gae