qatra-e-ashk hun palkon pe saja le mujhko

qatra-e-ashk huuñ palkoñ pe sajā le mujh ko

ho jo mumkin to in āñkhoñ meñ chhupā le mujh ko

maiñ to saḌkoñ pe phirā kartā huuñ pāgal kī tarah

kaun kahtā hai ki siine se lagā le mujh ko

maiñ vo daana huuñ har ik dil ko harā kar dūñgā

ho sake to kisī banjar meñ ugā le mujh ko

jaane kab tak maiñ phirūñgā yūñhī sahrā sahrā

ab mire jism kā saaya hī sañbhāle mujh ko

chāñd bādal meñ jo chhup jaa.e añdherā ho jaa.e

ġham kī is raat meñ de kaun ujāle mujh ko

maiñ to phūTī huī taqdīr kā ā.īna huuñ

tū kisī raah kā patthar hī banā le mujh ko

kis ko samjhā.ūñ mohabbat kī haqīqat 'afsar'

log milte haiñ zamāne meñ nirāle mujh ko

qatra-e-ashk hun palkon pe saja le mujh ko

ho jo mumkin to in aankhon mein chhupa le mujh ko

main to saDkon pe phira karta hun pagal ki tarah

kaun kahta hai ki sine se laga le mujh ko

main wo dana hun har ek dil ko hara kar dunga

ho sake to kisi banjar mein uga le mujh ko

jaane kab tak main phirunga yunhi sahra sahra

ab mere jism ka saya hi sanbhaale mujh ko

chand baadal mein jo chhup jae andhera ho jae

gham ki is raat mein de kaun ujale mujh ko

main to phuTi hui taqdir ka aaina hun

tu kisi rah ka patthar hi bana le mujh ko

kis ko samjhaun mohabbat ki haqiqat 'afsar'

log milte hain zamane mein nirale mujh ko