qatra hun main wusat de dariya kar de

qatra huuñ maiñ vus.at de dariyā kar de

tū chāhe to sāgar ko sahrā kar de

talḳhī kā ehsās miTā de duniyā se

yā-rab tū har peḌ kā phal mīThā kar de

ye ḳhvāhish to sadiyoñ se hai nasloñ kī

ḳhud zāhir ho yā mujh ko ifshā kar de

zard chaTāneñ kaaT rahā huuñ sahrā meñ

gard kī chādar phailā kar saaya kar de

laaj bachā le merī kaj-dastārī kī

baunoñ kī bastī meñ qad ūñchā kar de

zanjīroñ par itnā bharosā mat karnā

josh-e-junūñ meñ vahshī jaane kyā kar de

insāñ ḳhud hai ḳhāliq apnī zarūrat kā

chalte chalte pagDanDī paidā kar de

abr bane to khārī paanī mīThā ho

terī mashiyyat jab chāhe jaisā kar de

merī mohabbat zāmin hai shādābī kī

terī chāhat pattoñ ko piilā kar de

rone vaalo ye bhī to ho saktā hai

ḳhuun kā chhīñTā qātil ko rusvā kar de

itnī duurī 'ramz' hai kyuuñ ghar vāloñ meñ

nafrat kī dīvār girā rasta kar de

qatra hun main wusat de dariya kar de

tu chahe to sagar ko sahra kar de

talKHi ka ehsas miTa de duniya se

ya-rab tu har peD ka phal miTha kar de

ye KHwahish to sadiyon se hai naslon ki

KHud zahir ho ya mujh ko ifsha kar de

zard chaTanen kaT raha hun sahra mein

gard ki chadar phaila kar saya kar de

laj bacha le meri kaj-dastari ki

baunon ki basti mein qad uncha kar de

zanjiron par itna bharosa mat karna

josh-e-junun mein wahshi jaane kya kar de

insan KHud hai KHaliq apni zarurat ka

chalte chalte pagDanDi paida kar de

abr bane to khaari pani miTha ho

teri mashiyyat jab chahe jaisa kar de

meri mohabbat zamin hai shadabi ki

teri chahat patton ko pila kar de

rone walo ye bhi to ho sakta hai

KHun ka chhinTa qatil ko ruswa kar de

itni duri 'ramz' hai kyun ghar walon mein

nafrat ki diwar gira rasta kar de