qatre mein bhi chhupe hain bhanwar raqs kijiye

qatre meñ bhī chhupe haiñ bhañvar raqs kījiye

qaid-e-sadaf meñ misl-e-guhar raqs kījiye

kiije fasurdagī-e-tabī.at kā kuchh ilaaj

is ḳhāk-dāñ meñ misl-e-sharar raqs kījiye

ik naujavāñ ne aaj buzurgoñ se kah diyā

hotī nahīñ jo umr basar raqs kījiye

suuje haiñ paañv aañkh se hī taal dījiye

uljhā huā hai tār-e-nazar raqs kījiye

gardish meñ ik sitāra-e-be-chāra hī nahīñ

hai āsmāñ bhī zer-o-zabar raqs kījiye

guzre jo māh-o-sāl to lai bhī badal ga.ī

ab ke baras ba-rañg-e-digar raqs kījiye

fariyād kījiye na koī zulm Dhā.iye

ik vahm hai shikast-o-zafar raqs kījiye

is tā.ife meñ ek kamī hai to aap kī

ai dushmanān-e-ilm-o-hunar raqs kījiye

fashion hai āj-kal kā madārī kī DugDugī

dil chāhe yā na chāhe magar raqs kījiye

apnī to jhoñpaḌī meñ thiraktā nahīñ charāġh

jā kar kisī raqīb ke ghar raqs kījiye

'sayyad' na radio na cinema hai aap kā

apne hī giit gā.iye aur raqs kījiye

qatre mein bhi chhupe hain bhanwar raqs kijiye

qaid-e-sadaf mein misl-e-guhar raqs kijiye

kije fasurdagi-e-tabiat ka kuchh ilaj

is KHak-dan mein misl-e-sharar raqs kijiye

ek naujawan ne aaj buzurgon se kah diya

hoti nahin jo umr basar raqs kijiye

suje hain panw aankh se hi tal dijiye

uljha hua hai tar-e-nazar raqs kijiye

gardish mein ek sitara-e-be-chaara hi nahin

hai aasman bhi zer-o-zabar raqs kijiye

guzre jo mah-o-sal to lai bhi badal gai

ab ke baras ba-rang-e-digar raqs kijiye

fariyaad kijiye na koi zulm Dhaiye

ek wahm hai shikast-o-zafar raqs kijiye

is taife mein ek kami hai to aap ki

ai dushmanan-e-ilm-o-hunar raqs kijiye

fashion hai aaj-kal ka madari ki DugDugi

dil chahe ya na chahe magar raqs kijiye

apni to jhonpaDi mein thirakta nahin charagh

ja kar kisi raqib ke ghar raqs kijiye

'sayyad' na radio na cinema hai aap ka

apne hi git gaiye aur raqs kijiye