qaza ke sath chale zindagi ke badle mein

qazā ke saath chale zindagī ke badle meñ

milī na chhāñv bhī ahal-e-amal ko raste meñ

javāb-e-shahr-e-ḳhamoshāñ har ek bastī hai

gulāb khilte nahīñ ab kisī darīche meñ

ġham-e-hayāt kī paiġhambarāna ulfat ko

na jaane kab se basā.e hue haiñ siine meñ

pahuñch chuke haiñ yaqīñ kī hudūd meñ phir bhī

laraz rahe haiñ qadam saath saath chalne meñ

shu.ūr-e-zīst kī alhaḌ kiran nazar aa.ī

hayāt-e-nau ke simaTte hue dhundalke meñ

tumhāre qurb kī vo sā.at-e-hasīñ ab bhī

ravāñ hai saath mire yaad ke safīne meñ

har ek saañs sū-e-kahkashāñ baḌhī lekin

qadam bhaTakte rahe umr bhar añdhere meñ

nikal ke mahbas-e-shab-rañg se junūñ vaale

asiir hote rahe asr-e-nau ke dhoke meñ

kare jo azm-e-safar us ko ye ḳhabar kar do

ki ik paḌāv haiñ ham is tavīl mele meñ

bahā jo sub.h-e-bahārāñ kī justujū meñ 'umīd'

usī lahū kā hai partav har ik shagūfe meñ

qaza ke sath chale zindagi ke badle mein

mili na chhanw bhi ahal-e-amal ko raste mein

jawab-e-shahr-e-KHamoshan har ek basti hai

gulab khilte nahin ab kisi dariche mein

gham-e-hayat ki paighambarana ulfat ko

na jaane kab se basae hue hain sine mein

pahunch chuke hain yaqin ki hudud mein phir bhi

laraz rahe hain qadam sath sath chalne mein

shuur-e-zist ki alhaD kiran nazar aai

hayat-e-nau ke simaTte hue dhundalke mein

tumhaare qurb ki wo saat-e-hasin ab bhi

rawan hai sath mere yaad ke safine mein

har ek sans su-e-kahkashan baDhi lekin

qadam bhaTakte rahe umr bhar andhere mein

nikal ke mahbas-e-shab-rang se junun wale

asir hote rahe asr-e-nau ke dhoke mein

kare jo azm-e-safar us ko ye KHabar kar do

ki ek paDaw hain hum is tawil mele mein

baha jo subh-e-bahaaran ki justuju mein 'umid'

usi lahu ka hai partaw har ek shagufe mein