qimat nahin rakkhi qad-o-qamat nahin rakkha

qīmat nahīñ rakkhī qad-o-qāmat nahīñ rakkhā

ham ne to koī kār-e-siyāsat nahīñ rakkhā

ab mo.ajiza hone se rahā tere badan se

ham ne bhī magar shauq-e-rifāqat nahīñ rakkhā

khul kar mire baare meñ tirī raa.e nahīñ thī

tū ne hī gila hasb-e-rivāyat nahīñ rakkhā

āñkhoñ kī tarah chhat bhī Tapaktī rahī shab bhar

bārish ne mirā ghar bhī salāmat nahīñ rakkhā

kis ne hameñ āvārgī-e-shahr atā kī

kis ne hameñ masrūf-e-ibādat nahīñ rakkhā

ab ḳhuun pasīne kī kamā.ī nahīñ miltī

kyoñ rizq mirā hasb-e-liyāqat nahīñ rakkhā

qimat nahin rakkhi qad-o-qamat nahin rakkha

hum ne to koi kar-e-siyasat nahin rakkha

ab moajiza hone se raha tere badan se

hum ne bhi magar shauq-e-rifaqat nahin rakkha

khul kar mere bare mein teri rae nahin thi

tu ne hi gila hasb-e-riwayat nahin rakkha

aankhon ki tarah chhat bhi Tapakti rahi shab bhar

barish ne mera ghar bhi salamat nahin rakkha

kis ne hamein aawargi-e-shahr ata ki

kis ne hamein masruf-e-ibaadat nahin rakkha

ab KHun pasine ki kamai nahin milti

kyon rizq mera hasb-e-liyaqat nahin rakkha