قسمت دیر نہیں کرتی ہے جس کو دریا دینے میں

قسمت دیر نہیں کرتی ہے جس کو دریا دینے میں

اکثر دیر لگاتی ہے وہ اس کو تنکا دینے میں

اپنی مرضی سے مت جانا تو کھائی کے کنارے تک

وقت کے ہاتھ نہیں کانپیں گے تجھ کو دھکا دینے میں

تجھ کو تجوری میں رکھنے کا مجھ کو کوئی شوق نہیں

مجھ کو خرچ نہیں ہونا ہے تجھ پر پہرہ دینے میں

تو نے کم مانگا ہے مجھ کو لیکن میری بھی تو سوچ

پورا ختم نہ ہو جاؤں میں تھوڑا تھوڑا دینے میں

سب کو رستہ مل جانے دے ان کی منزل کا بھگون

مجھ کو منزل مل جانے دے سب کو رستہ دینے میں