قسمت کا ہیر پھیر کچھ ایسا برا نہ ہو

قسمت کا ہیر پھیر کچھ ایسا برا نہ ہو

گھر میں بس ایک پیڑ ہو وہ بھی ہرا نہ ہو

تجھ کو ہو میرے لمس کی خواہش شدید تر

تجھ سے تمام عمر مرا سامنا نہ ہو

دولت ہو اور کوئی بھی مصرف نہ مل سکے

یعنی کہ حسن ہو پہ کوئی دیکھتا نہ ہو

مدت کے بعد شہر اداسی میں آج پھر

پازیب کی جھنک ہے کوئی سانحہ نہ ہو

کچھ تو پرانا پن بھی بچا اپنے آپ میں

پہچان میں نہ آئے تو ایسا نیا نہ ہو

وحشت سرائے زیست سے اکتا کے ایک دن

تھک کر خدا کو جائیے لیکن خدا نہ ہو