qismat to dekho mah-e-mubin tak pahunch gae

qismat to dekho māh-e-mubīñ tak pahuñch ga.e

ik shab ye hoñT un kī jabīñ tak pahuñch ga.e

sadiyoñ kā fāsla thā hamāre liye magar

tum ek pal meñ haañ se nahīñ tak pahuñch ga.e

ye kis ke naqsh-e-pā pe chale jā rahe the ham

ḳhvāboñ meñ raat 'arsh-e-barīñ tak pahuñch ga.e

dauḌeñge saath saath ragoñ meñ lahū ke ab

ye ġham tumhāre qalb-e-hazīñ tak pahuñch ga.e

baiThā thā jis jagah pe vo mahfil meñ gul-badan

ham bhī sarak sarak ke vahīñ tak pahuñch ga.e

Dartā huuñ chhoḌ deñ na kahīñ naqsh-e-pā yahāñ

'sayyad' vo dil kī narm zamīñ tak pahuñch ga.e

qismat to dekho mah-e-mubin tak pahunch gae

ek shab ye honT un ki jabin tak pahunch gae

sadiyon ka fasla tha hamare liye magar

tum ek pal mein han se nahin tak pahunch gae

ye kis ke naqsh-e-pa pe chale ja rahe the hum

KHwabon mein raat 'arsh-e-barin tak pahunch gae

dauDenge sath sath ragon mein lahu ke ab

ye gham tumhaare qalb-e-hazin tak pahunch gae

baiTha tha jis jagah pe wo mahfil mein gul-badan

hum bhi sarak sarak ke wahin tak pahunch gae

Darta hun chhoD den na kahin naqsh-e-pa yahan

'sayyad' wo dil ki narm zamin tak pahunch gae