قسمت تو دیکھو ماہ مبیں تک پہنچ گئے

قسمت تو دیکھو ماہ مبیں تک پہنچ گئے

اک شب یہ ہونٹ ان کی جبیں تک پہنچ گئے

صدیوں کا فاصلہ تھا ہمارے لئے مگر

تم ایک پل میں ہاں سے نہیں تک پہنچ گئے

یہ کس کے نقش پا پہ چلے جا رہے تھے ہم

خوابوں میں رات عرش بریں تک پہنچ گئے

دوڑیں گے ساتھ ساتھ رگوں میں لہو کے اب

یہ غم تمہارے قلب حزیں تک پہنچ گئے

بیٹھا تھا جس جگہ پہ وہ محفل میں گل بدن

ہم بھی سرک سرک کے وہیں تک پہنچ گئے

ڈرتا ہوں چھوڑ دیں نہ کہیں نقش پا یہاں

سیدؔ وہ دل کی نرم زمیں تک پہنچ گئے