qissa-e-jaan-guza kahun na kahun

qissa-e-jāñ-guzā kahūñ na kahūñ

hijr kā mājrā kahūñ na kahūñ

na huī manzil-e-talab hāsil

ḳhizr ko rahnumā kahūñ na kahūñ

ab to is ne bhī saath chhoḌ diyā

umr ko bevafā kahūñ na kahūñ

jab davā fā.eda nahīñ kartī

dard ko be-davā kahūñ na kahūñ

be-riyā.ī meñ fard hai vo bhī

rind ko pārsā kahūñ na kahūñ

jis se paḌ jaa.eñ aable lab par

tum se vo mājrā kahūñ na kahūñ

mujh ko girdāb se bachā laayā

nāḳhudā ko ḳhudā kahūñ na kahūñ

haram-o-dair meñ bhī vo na milā

baḳht ko nā-rasā kahūñ na kahūñ

qissa-e-jaan-guza kahun na kahun

hijr ka majra kahun na kahun

na hui manzil-e-talab hasil

KHizr ko rahnuma kahun na kahun

ab to is ne bhi sath chhoD diya

umr ko bewafa kahun na kahun

jab dawa faeda nahin karti

dard ko be-dawa kahun na kahun

be-riyai mein fard hai wo bhi

rind ko parsa kahun na kahun

jis se paD jaen aable lab par

tum se wo majra kahun na kahun

mujh ko girdab se bacha laya

naKHuda ko KHuda kahun na kahun

haram-o-dair mein bhi wo na mila

baKHt ko na-rasa kahun na kahun