qissa-e-naf-o-zarar yaad aaya

qissa-e-naf-o-zarar yaad aaya

phir azīzoñ kā hunar yaad aaya

peT par bāñdh liyā hai patthar

jab kabhī luqma-e-tar yaad aaya

aaya piirī meñ ibādat kā ḳhayāl

haa.e kab zād-e-safar yaad aaya

jab kabhī us ko bhulānā chāhā

vo ba-andāz-e-digar yaad aaya

dekh kar dast-e-hinā.ī un kā

ḳhūn-e-dil ḳhūn-e-jigar yaad aaya

nahīñ āsān zamīn-e-'ġhālib'

thā hameñ zo.am-e-hunar yaad aaya

koī miltā thā gale ham se 'shakīl'

dekh kar shāne ko sar yaad aaya

qissa-e-naf-o-zarar yaad aaya

phir azizon ka hunar yaad aaya

peT par bandh liya hai patthar

jab kabhi luqma-e-tar yaad aaya

aaya piri mein ibaadat ka KHayal

hae kab zad-e-safar yaad aaya

jab kabhi us ko bhulana chaha

wo ba-andaz-e-digar yaad aaya

dekh kar dast-e-hinai un ka

KHun-e-dil KHun-e-jigar yaad aaya

nahin aasan zamin-e-'ghaalib'

tha hamein zoam-e-hunar yaad aaya

koi milta tha gale hum se 'shakil'

dekh kar shane ko sar yaad aaya