qubul kash meri itni si guzarish ho

qubūl kaash mirī itnī sī guzārish ho

kisī ke qalb meñ nafrat ho aur na ranjish ho

khileñge phuul yaqīnan ḳhizāñ meñ chāhat ke

jo shāḳh-e-dil pe sanam aap kī navāzish ho

dhuāñ sā uThtā ho jis ke malūl chehre se

to phir zarūrī hai dil bhī shikār-e-ātish ho

hue haiñ ġhair tire apne kyoñ kabhī sochā

tire ḳhilāf ye apnoñ kī hī na sāzish ho

chalo miTā.eñ adāvat kī rasm duniyā se

vafā pe pahra na chāhat pe koī bandish ho

ḳhizāñ-rasīda hai gulshan ye qalb-e-muztar kā

kahīñ ujaḌ hī na jaa.e ḳhushī kī bārish ho

mujhe yaqīn hai manzil vo 'sād' pā.egā

ho jis ke dil meñ lagan aur sachchī ḳhvāhish ho

qubul kash meri itni si guzarish ho

kisi ke qalb mein nafrat ho aur na ranjish ho

khilenge phul yaqinan KHizan mein chahat ke

jo shaKH-e-dil pe sanam aap ki nawazish ho

dhuan sa uThta ho jis ke malul chehre se

to phir zaruri hai dil bhi shikar-e-atish ho

hue hain ghair tere apne kyon kabhi socha

tere KHilaf ye apnon ki hi na sazish ho

chalo miTaen adawat ki rasm duniya se

wafa pe pahra na chahat pe koi bandish ho

KHizan-rasida hai gulshan ye qalb-e-muztar ka

kahin ujaD hi na jae KHushi ki barish ho

mujhe yaqin hai manzil wo 'sad' paega

ho jis ke dil mein lagan aur sachchi KHwahish ho