qubul kar ke tera gham KHushi KHushi maine

qubūl kar ke terā ġham ḳhushī ḳhushī maiñ ne

tire jamāl ko baḳhshī hai zindagī maiñ ne

bas ik nigāh-e-tavajjoh pe is tarah ḳhush huuñ

ki jaise daulat-e-kaunain luuT lī maiñ ne

dhaḌak rahā thā mire har-nafas meñ dil un kā

sunī qarīb se āvāz duur kī maiñ ne

zamāna tā-ba-abad un ko bhar nahīñ saktā

jigar pe khaa.e haiñ vo zaḳhm-e-dostī maiñ ne

tire jamāl kī sar-mastiyoñ meñ gum ho kar

har ek sā.at-e-hastī guzār dī maiñ ne

ḳhudā-e-do-jahāñ is jurm ko muaaf kare

uḌaa.ī hai lab-e-gul-rañg kī hañsī maiñ ne

'hamīd' mujh ko zamāna bhulā nahīñ saktā

banā liyā hai mohabbat ko zindagī maiñ ne

qubul kar ke tera gham KHushi KHushi main ne

tere jamal ko baKHshi hai zindagi main ne

bas ek nigah-e-tawajjoh pe is tarah KHush hun

ki jaise daulat-e-kaunain luT li main ne

dhaDak raha tha mere har-nafas mein dil un ka

suni qarib se aawaz dur ki main ne

zamana ta-ba-abad un ko bhar nahin sakta

jigar pe khae hain wo zaKHm-e-dosti main ne

tere jamal ki sar-mastiyon mein gum ho kar

har ek saat-e-hasti guzar di main ne

KHuda-e-do-jahan is jurm ko muaf kare

uDai hai lab-e-gul-rang ki hansi main ne

'hamid' mujh ko zamana bhula nahin sakta

bana liya hai mohabbat ko zindagi main ne