qudrat ne di hai mujhko bahaar-afrin nazar

qudrat ne dī hai mujh ko bahār-āfrīñ nazar

kitnī hasīñ nazar hai ye kitnī hasīñ nazar

dekhī nishān-e-sajde meñ tasvīr husn kī

raushan huī to ban ga.ī merī hasīñ nazar

madfan meñ ham to aa.e the duniyā ko chhoḌ kar

duniyā ik aur aatī hai zer-e-zamīñ nazar

chhup kar hijāb-e-nāz meñ bhī vo na chhup sake

allah re shauq-e-dīd kī pahuñchī vahīñ nazar

vo aa.eñ bhī to maiñ unheñ dekhūñgā kis tarah

detī nahīñ hai kaam dam-e-vāpsīñ nazar

majbūriyāñ bhī saath rahīñ iḳhtiyār meñ

rahtā hai dil meñ vo magar aatā nahīñ nazar

maiñ hāl-e-be-ḳhudī bhī kahūñ tum se kyā 'zabīh'

baiThā huā kahīñ huuñ magar hai kahīñ nazar

qudrat ne di hai mujh ko bahaar-afrin nazar

kitni hasin nazar hai ye kitni hasin nazar

dekhi nishan-e-sajde mein taswir husn ki

raushan hui to ban gai meri hasin nazar

madfan mein hum to aae the duniya ko chhoD kar

duniya ek aur aati hai zer-e-zamin nazar

chhup kar hijab-e-naz mein bhi wo na chhup sake

allah re shauq-e-did ki pahunchi wahin nazar

wo aaen bhi to main unhen dekhunga kis tarah

deti nahin hai kaam dam-e-wapsin nazar

majburiyan bhi sath rahin iKHtiyar mein

rahta hai dil mein wo magar aata nahin nazar

main haal-e-be-KHudi bhi kahun tum se kya 'zabih'

baiTha hua kahin hun magar hai kahin nazar