qulzum-e-ulfat mein wo tufan ka aalam hua

qulzum-e-ulfat meñ vo tūfān kā aalam huā

jo safīna dil kā thā darham huā barham huā

thāmnā mushkil dil-e-muztar ko shām-e-ġham huā

yaad aate hī kisī kī hashr kā aalam huā

kyā batā.eñ kis tarah guzrī shab-e-vāda mirī

muntazir āñkheñ rahīñ dil kā ajab aalam huā

dekhte rahte haiñ is meñ saare aalam kā zuhūr

ā.īna dil kā hamāre rashk-e-jām-e-jam huā

vo adū ko saath laa.e haiñ mire ghar dekhiye

sharbat-e-dīdār ke nusḳhe meñ dāḳhil sam huā

aap ke tīr-e-nazar se dil kā bachnā hai muhāl

jis ko dekhā aañkh bhar kar bas vahī hamdam huā

kis qadar taskīn ranjūr-e-mohabbat ko huī

pyaar se dekhā jo us ne zaḳhm ko marham huā

jab uThāyā yaar ne rū-e-munavvar se naqāb

gir paḌā ġhash khā ke koī aur koī be-dam huā

gulshan-e-hastī meñ insāñ kī nahīñ kuchh zindagī

jo huā paidā misāl-e-qatra-e-shabnam huā

gesu-e-pur-ḳham hue un ke pareshāñ sog meñ

mere marne se dayār-e-husn meñ mātam huā

baad marne ke huā duniyā meñ yuuñ mash.hūr 'nāz'

shaan se tābūt uTThā dhuum kā mātam huā

qulzum-e-ulfat mein wo tufan ka aalam hua

jo safina dil ka tha darham hua barham hua

thamna mushkil dil-e-muztar ko sham-e-gham hua

yaad aate hi kisi ki hashr ka aalam hua

kya bataen kis tarah guzri shab-e-wada meri

muntazir aankhen rahin dil ka ajab aalam hua

dekhte rahte hain is mein sare aalam ka zuhur

aaina dil ka hamare rashk-e-jam-e-jam hua

wo adu ko sath lae hain mere ghar dekhiye

sharbat-e-didar ke nusKHe mein daKHil sam hua

aap ke tir-e-nazar se dil ka bachna hai muhaal

jis ko dekha aankh bhar kar bas wahi hamdam hua

kis qadar taskin ranjur-e-mohabbat ko hui

pyar se dekha jo us ne zaKHm ko marham hua

jab uThaya yar ne ru-e-munawwar se naqab

gir paDa ghash kha ke koi aur koi be-dam hua

gulshan-e-hasti mein insan ki nahin kuchh zindagi

jo hua paida misal-e-qatra-e-shabnam hua

gesu-e-pur-KHam hue un ke pareshan sog mein

mere marne se dayar-e-husn mein matam hua

baad marne ke hua duniya mein yun mashhur 'naz'

shan se tabut uTTha dhum ka matam hua