qurb us ka dil-e-zar ko taDpae hai kuchh aur

qurb us kā dil-e-zār ko taḌpā.e hai kuchh aur

hai dard vo darmāñ se jo baḌh jaa.e hai kuchh aur

kyā hai ye tilismāt jahāñ aql hai sardār

hai asl meñ kuchh aur nazar aa.e hai kuchh aur

sard aahoñ se mazlūmoñ kī taḌpe hai dil-e-zār

chalne se huā ġhuncha ye murjhā.e hai kuchh aur

lazzat tirī shīrīñ-suḳhanī meñ bhī hai lekin

dil talḳhī-e-daurāñ meñ mazā paa.e hai kuchh aur

bas kar nigah-e-nāz tirī taab nahīñ ab

ye lutf dil-e-zār ko taḌpā.e hai kuchh aur

shorīdgī-e-dil kā hai aalam hī nirālā

rang ab kī bahārāñ meñ junūñ laa.e hai kuchh aur

baḌhtā hai junūñ vādī-e-ulfat meñ ziyāda

is dasht meñ talvā mirā khujlā.e hai kuchh aur

is par bhī kabhī hogī nigāh-e-karam-e-yār

dil us ke tasavvur se hī itrā.e hai kuchh aur

aksar nigah-e-qahr ke sadme sahe lekin

terī nigah-e-lutf sitam Dhaa.e hai kuchh aur

uqda na haqīqat kā khule dast-e-ḳhirad se

suljhāne se gutthī ye ulajh jaa.e hai kuchh aur

jitnī use bahlāne kī karte haiñ sa.ī log

dil apnā 'valī' utnā hī ghabrā.e hai kuchh aur

qurb us ka dil-e-zar ko taDpae hai kuchh aur

hai dard wo darman se jo baDh jae hai kuchh aur

kya hai ye tilismat jahan aql hai sardar

hai asl mein kuchh aur nazar aae hai kuchh aur

sard aahon se mazlumon ki taDpe hai dil-e-zar

chalne se hua ghuncha ye murjhae hai kuchh aur

lazzat teri shirin-suKHani mein bhi hai lekin

dil talKHi-e-dauran mein maza pae hai kuchh aur

bas kar nigah-e-naz teri tab nahin ab

ye lutf dil-e-zar ko taDpae hai kuchh aur

shoridgi-e-dil ka hai aalam hi nirala

rang ab ki bahaaran mein junun lae hai kuchh aur

baDhta hai junun wadi-e-ulfat mein ziyaada

is dasht mein talwa mera khujlae hai kuchh aur

is par bhi kabhi hogi nigah-e-karam-e-yar

dil us ke tasawwur se hi itrae hai kuchh aur

aksar nigah-e-qahr ke sadme sahe lekin

teri nigah-e-lutf sitam Dhae hai kuchh aur

uqda na haqiqat ka khule dast-e-KHirad se

suljhane se gutthi ye ulajh jae hai kuchh aur

jitni use bahlane ki karte hain sai log

dil apna 'wali' utna hi ghabrae hai kuchh aur