qurban ho rahi hai meri jaan idhar-udhar

qurbān ho rahī hai mirī jaañ idhar-udhar

vaañ rah pe hai jo zulf-e-pareshāñ idhar-udhar

jaate haiñ jab vo sū-e-chaman sair ke liye

hote haiñ saath āshiq-e-nālāñ idhar-udhar

haiñ laḳht-e-dil kahīñ to kahīñ pāra-e-jigar

rahte haiñ pesh-e-chashm-e-gulistāñ idhar-udhar

hañgāma-e-junūñ se jo donoñ hue haiñ chaak

dāman idhar-udhar hai garebāñ idhar-udhar

zulfeñ chhuTī huī haiñ jo chehre pe do taraf

lahrā rahe haiñ af.ī-e-pechāñ idhar-udhar

dekhā unhoñ ne murda mujhe maiñ ne ashk-bār

aa.e nazar haiñ ḳhvāb-e-pareshāñ idhar-udhar

yā dushmanoñ se qat.a ho yā mujh se tark-e-rabt

kyuuñ dil ko kar rahe ho mirī jaañ idhar-udhar

mutrib vahāñ haiñ jam.a navā-sāz us taraf

hote haiñ kal se aish ke sāmāñ idhar-udhar

kyuuñ kar karūñ maiñ baat chap-o-rāst-e-yār kī

rahte haiñ saath saath nigahbāñ idhar-udhar

vo apnī haT pe haiñ mujhe apne kahe kī zid

samjhā rahe haiñ donoñ ko insāñ idhar-udhar

āñkhoñ pe sā.ebāñ haiñ maze diid ke hoñ kyā

phaile hue haiñ dāman-e-mizhgāñ idhar-udhar

vo but hai maiñ huuñ sāhib-e-dīñ bahr-e-faisla

hote haiñ jam.a gabr-o-musalmāñ idhar-udhar

vo chāhte haiñ aa.eñ maiñ kahtā huuñ aap jā.ūñ

kis lutf par hai raġhbat-e-ehsāñ idhar-udhar

nālāñ vo aqrabā se maiñ huuñ muḳhbiroñ se tañg

kis kis tarah ke dil meñ haiñ armāñ idhar-udhar

harjā.ī un ko kahte haiñ be-sharm mujh ko log

uThte haiñ rāt-din yahī tūfāñ idhar-udhar

manzūr hai jo ranjish-e-sābiq kā faisla

har roz jam.a hote haiñ mehmāñ idhar-udhar

haiñ pahluoñ meñ daaġh jo donoñ taraf 'nasīm'

jalva dikhā rahe haiñ gulistāñ idhar-udhar

qurban ho rahi hai meri jaan idhar-udhar

wan rah pe hai jo zulf-e-pareshan idhar-udhar

jate hain jab wo su-e-chaman sair ke liye

hote hain sath aashiq-e-nalan idhar-udhar

hain laKHt-e-dil kahin to kahin para-e-jigar

rahte hain pesh-e-chashm-e-gulistan idhar-udhar

hangama-e-junun se jo donon hue hain chaak

daman idhar-udhar hai gareban idhar-udhar

zulfen chhuTi hui hain jo chehre pe do taraf

lahra rahe hain afi-e-pechan idhar-udhar

dekha unhon ne murda mujhe main ne ashk-bar

aae nazar hain KHwab-e-pareshan idhar-udhar

ya dushmanon se qata ho ya mujh se tark-e-rabt

kyun dil ko kar rahe ho meri jaan idhar-udhar

mutrib wahan hain jama nawa-saz us taraf

hote hain kal se aish ke saman idhar-udhar

kyun kar karun main baat chap-o-rast-e-yar ki

rahte hain sath sath nigahban idhar-udhar

wo apni haT pe hain mujhe apne kahe ki zid

samjha rahe hain donon ko insan idhar-udhar

aankhon pe saeban hain maze did ke hon kya

phaile hue hain daman-e-mizhgan idhar-udhar

wo but hai main hun sahib-e-din bahr-e-faisla

hote hain jama gabr-o-musalman idhar-udhar

wo chahte hain aaen main kahta hun aap jaun

kis lutf par hai raghbat-e-ehsan idhar-udhar

nalan wo aqraba se main hun muKHbiron se tang

kis kis tarah ke dil mein hain arman idhar-udhar

harjai un ko kahte hain be-sharm mujh ko log

uThte hain raat-din yahi tufan idhar-udhar

manzur hai jo ranjish-e-sabiq ka faisla

har roz jama hote hain mehman idhar-udhar

hain pahluon mein dagh jo donon taraf 'nasim'

jalwa dikha rahe hain gulistan idhar-udhar