qusur ishq mein zahir hai sab hamara tha

qusūr ishq meñ zāhir hai sab hamārā thā

tirī nigāh ne dil ko magar pukārā thā

vo din bhī kyā the ki har baat meñ ishārā thā

diloñ kā raaz nigāhoñ se āshkārā thā

havā-e-shauq ne rañg-e-hayā nikhārā thā

chaman chaman lab-o-ruḳhsār kā nazārā thā

fareb khā ke tirī shoḳhiyoñ se kyā pūchheñ

hayāt o marg meñ kis kī taraf ishārā thā

sujūd-e-husn kī tamkīñ pe baar thā varna

jabīn-e-shauq ko ye nañg bhī gavārā thā

chaman meñ aag na lagtī to aur kyā hotā

ki phuul phuul ke dāman meñ ik sharārā thā

tabāhiyoñ kā to dil kī gila nahīñ lekin

kisī ġharīb kā ye āḳhirī sahārā thā

bahut latīf the nazzāre husn-e-barham ke

magar nigāh uThāne kā kis ko yaarā thā

ye kahiye zauq-e-junūñ kaam aa gayā 'tābāñ'

nahīñ to rasm-o-rah-e-āgahī ne maarā thā

qusur ishq mein zahir hai sab hamara tha

teri nigah ne dil ko magar pukara tha

wo din bhi kya the ki har baat mein ishaara tha

dilon ka raaz nigahon se aashkara tha

hawa-e-shauq ne rang-e-haya nikhaara tha

chaman chaman lab-o-ruKHsar ka nazara tha

fareb kha ke teri shoKHiyon se kya puchhen

hayat o marg mein kis ki taraf ishaara tha

sujud-e-husn ki tamkin pe bar tha warna

jabin-e-shauq ko ye nang bhi gawara tha

chaman mein aag na lagti to aur kya hota

ki phul phul ke daman mein ek sharara tha

tabahiyon ka to dil ki gila nahin lekin

kisi gharib ka ye aaKHiri sahaara tha

bahut latif the nazzare husn-e-barham ke

magar nigah uThane ka kis ko yara tha

ye kahiye zauq-e-junun kaam aa gaya 'taban'

nahin to rasm-o-rah-e-agahi ne mara tha