raegan ishq ki mat KHud ko saza do anjum

rā.egāñ 'ishq kī mat ḳhud ko sazā do 'anjum'

jo tumheñ bhuul gayā us ko bhulā do anjum

mujh se bardāsht nahīñ hoñgī ab us kī bāteñ

merī jānib se zamāne ko batā do anjum

in kī chahkār se yādoñ meñ ḳhalal paḌtā hai

ghar kī dīvār se chiḌiyoñ ko uḌā do anjum

vo agar maan gayā hai to karo shukr adā

vo agar ruuTh gayā hai to du'ā do anjum

jo bhī miltā hai udāsī kā sabab pūchhtā hai

ek hī baar use naam batā do anjum

dekhnā us se guzārish hī na karnā pyāre

duniyā raste meñ agar aa.e haTā do anjum

us ke milne kī nahīñ hai koī sūrat phir bhī

vo zarūrī hai kahīñ se use lā do 'anjum'

raegan 'ishq ki mat KHud ko saza do 'anjum'

jo tumhein bhul gaya us ko bhula do anjum

mujh se bardasht nahin hongi ab us ki baaten

meri jaanib se zamane ko bata do anjum

in ki chahkar se yaadon mein KHalal paDta hai

ghar ki diwar se chiDiyon ko uDa do anjum

wo agar man gaya hai to karo shukr ada

wo agar ruTh gaya hai to du'a do anjum

jo bhi milta hai udasi ka sabab puchhta hai

ek hi bar use nam bata do anjum

dekhna us se guzarish hi na karna pyare

duniya raste mein agar aae haTa do anjum

us ke milne ki nahin hai koi surat phir bhi

wo zaruri hai kahin se use la do 'anjum'