rah bhola hun magar ye meri KHami to nahin

raah bholā huuñ magar ye mirī ḳhāmī to nahīñ

maiñ kahīñ aur se aayā huuñ maqāmī to nahīñ

ūñchā lahja hai faqat zor-e-dalā.el ke liye

ai mirī jaañ ye mirī talḳh-kalāmī to nahīñ

un daraḳhtoñ ko duā do ki jo raste meñ na the

jaldī aane kā sabab tez-ḳhirāmī to nahīñ

terī masnad pe koī aur nahīñ aa saktā

ye mirā dil hai koī ḳhālī asāmī to nahīñ

maiñ hama-vaqt mohabbat meñ paḌā rahtā thā

phir kisī dost se pūchhā ye ġhulāmī to nahīñ

bartarī itnī bhī apnī na jatā ai mire ishq

tū 'nadīm'-o-'zakī' o 'kāshif'-o-'kāmī' to nahīñ

rah bhola hun magar ye meri KHami to nahin

main kahin aur se aaya hun maqami to nahin

uncha lahja hai faqat zor-e-dalael ke liye

ai meri jaan ye meri talKH-kalami to nahin

un daraKHton ko dua do ki jo raste mein na the

jaldi aane ka sabab tez-KHirami to nahin

teri masnad pe koi aur nahin aa sakta

ye mera dil hai koi KHali asami to nahin

main hama-waqt mohabbat mein paDa rahta tha

phir kisi dost se puchha ye ghulami to nahin

bartari itni bhi apni na jata ai mere ishq

tu 'nadim'-o-'zaki' o 'kashif'-o-'kaami' to nahin