rah dushwar hai us pe jaana nahin

raah dushvār hai us pe jaanā nahīñ

log kahte rahe ham ne maanā nahīñ

ho ga.ī haiñ mizājoñ meñ tabdīliyāñ

der tak jāgnā muskurānā nahīñ

ghar kī ashyā meñ shāmil mohabbat rahe

ghar faqat markaz-e-āb-o-dāna nahīñ

zindagī ek jangal kī patlī saḌak

aur jangal ki jis meñ Thikānā nahīñ

bazm-e-yārāñ sajī roz kuchh is tarah

jaise 'ādat ho milnā milānā nahīñ

azhdahe ghoñsloñ ke muhāne pe haiñ

aur aage kā is ke fasāna nahīñ

kal zamīnoñ se tārīḳh niklegī jab

haDDiyāñ hī mileñgī ḳhazāna nahīñ

ik nasīhat suno apne sayyād ko

baḳhsh denā magar bhuul jaanā nahīñ

rah dushwar hai us pe jaana nahin

log kahte rahe hum ne mana nahin

ho gai hain mizajon mein tabdiliyan

der tak jagna muskurana nahin

ghar ki ashya mein shamil mohabbat rahe

ghar faqat markaz-e-ab-o-dana nahin

zindagi ek jangal ki patli saDak

aur jangal ki jis mein Thikana nahin

bazm-e-yaran saji roz kuchh is tarah

jaise 'adat ho milna milana nahin

azhdahe ghonslon ke muhane pe hain

aur aage ka is ke fasana nahin

kal zaminon se tariKH niklegi jab

haDDiyan hi milengi KHazana nahin

ek nasihat suno apne sayyaad ko

baKHsh dena magar bhul jaana nahin