rah-e-hasti ke har ek moD se bach kar nikle

rāh-e-hastī ke har ik moḌ se bach kar nikle

ahl-e-dānish se to dīvāne hī behtar nikle

vaqt kī tez havāoñ ne ajab moḌ liyā

phuul se haath jo the un meñ bhī patthar nikle

terī yādoñ ke sahāre jo guzāre ham ne

vo hī lamhāt faqat apnā muqaddar nikle

ham ne ġhairoñ ke bhī ashkoñ ko liyā dāman par

chāhe ḳhud ġham ke samundar meñ nahā kar nikle

un kī fariyād kā aahoñ kā asar hogā

apne hāthoñ se jo ghar apnā jalā kar nikle

ġham zamāne kī jafāoñ kā kareñ kyā 'ḳhālid'

jab garebān hī kāñToñ se sajā kar nikle

rah-e-hasti ke har ek moD se bach kar nikle

ahl-e-danish se to diwane hi behtar nikle

waqt ki tez hawaon ne ajab moD liya

phul se hath jo the un mein bhi patthar nikle

teri yaadon ke sahaare jo guzare hum ne

wo hi lamhat faqat apna muqaddar nikle

hum ne ghairon ke bhi ashkon ko liya daman par

chahe KHud gham ke samundar mein naha kar nikle

un ki fariyaad ka aahon ka asar hoga

apne hathon se jo ghar apna jala kar nikle

gham zamane ki jafaon ka karen kya 'KHalid'

jab gareban hi kanTon se saja kar nikle