rah-e-talab mein ahl-e-dil jab had-e-am se baDhe

rāh-e-talab meñ ahl-e-dil jab had-e-ām se baḌhe

kashmakash-e-hayāt ke aur bhī hausle baḌhe

kis se ye pūchhiye bhalā tishna-laboñ ko kyā milā

kahne ko yuuñ to roz hī saikḌoñ mai-kade baḌhe

koshish-e-paiham āfrīñ manzil ab aa ga.ī qarīb

muzhda ho ārzū-e-dil paañv ke aable baḌhe

aate hī us ne bazm meñ ruḳh pe naqāb Daal lī

haa.e vo manzar-e-hasīñ jaise diye jale baḌhe

vaqt kī āzmā.isheñ laatī haiñ ziist par nikhār

phūloñ ko dekh lījiye kāñToñ meñ jo pale-baḌhe

tābish-e-husn-e-yār ne chhīn lī tāb-e-arz-e-shauq

jitne qarīb aa.e vo utne hī fāsle baḌhe

rāhoñ ke ruḳh badal ga.e manzileñ duur ho ga.iiñ

ḳhizr ke e.atibār par jab kabhī qāfile baḌhe

rah-e-talab mein ahl-e-dil jab had-e-am se baDhe

kashmakash-e-hayat ke aur bhi hausle baDhe

kis se ye puchhiye bhala tishna-labon ko kya mila

kahne ko yun to roz hi saikDon mai-kade baDhe

koshish-e-paiham aafrin manzil ab aa gai qarib

muzhda ho aarzu-e-dil panw ke aable baDhe

aate hi us ne bazm mein ruKH pe naqab Dal li

hae wo manzar-e-hasin jaise diye jale baDhe

waqt ki aazmaishen lati hain zist par nikhaar

phulon ko dekh lijiye kanTon mein jo pale-baDhe

tabish-e-husn-e-yar ne chhin li tab-e-arz-e-shauq

jitne qarib aae wo utne hi fasle baDhe

rahon ke ruKH badal gae manzilen dur ho gain

KHizr ke eatibar par jab kabhi qafile baDhe