راہ طلب میں عزم تجسس جواں رہے

راہ طلب میں عزم تجسس جواں رہے

منزل جو بے نشاں ہے مری بے نشاں رہے

ہم دل فگار چاک گریباں جہاں رہے

پیہم نشانۂ ستم آسماں رہے

آنکھوں سے اشک بن کے ٹپکتا ہے ایک روز

وہ سوز غم جو قلب حزیں میں نہاں رہے

بیداد چرخ نے گو ہمیں خاک کر دیا

تیرا جمال زینت بزم جہاں رہے

اپنی طرف سے لاکھ وہ ہم سے کھنچا کئے

پھر بھی ہمارے دیدۂ دل میں نہاں رہے

تا زندگی نریشؔ کسی کے فراق میں

آنکھوں سے میری خون کے آنسو رواں رہے