rah-e-ulfat mein maqamat purane aae

rāh-e-ulfat meñ maqāmāt purāne aa.e

tum na aa.e to mujhe yaad fasāne aa.e

vaqt-e-ruḳhsat na diyā saath zabāñ ne lekin

ashk ban kar mirī āñkhoñ meñ tarāne aa.e

raat ke vaqt har ik samt the naqlī sūraj

saa.e the asl jo kirdār nibhāne aa.e

vaqt aatā hī nahīñ lauT ke ye baat hai jhuuT

merī āñkhoñ meñ ka.ī guzre zamāne aa.e

zindagī haar ga.ī haar kā mātam na kiyā

aise lamhāt to kitne hī na jaane aa.e

ghar mirā jal gayā lekin ye tasallī hai mujhe

aag jo de ke ga.e aag bujhāne aa.e

rah-e-ulfat mein maqamat purane aae

tum na aae to mujhe yaad fasane aae

waqt-e-ruKHsat na diya sath zaban ne lekin

ashk ban kar meri aankhon mein tarane aae

raat ke waqt har ek samt the naqli suraj

sae the asl jo kirdar nibhane aae

waqt aata hi nahin lauT ke ye baat hai jhuT

meri aankhon mein kai guzre zamane aae

zindagi haar gai haar ka matam na kiya

aise lamhat to kitne hi na jaane aae

ghar mera jal gaya lekin ye tasalli hai mujhe

aag jo de ke gae aag bujhane aae