rah-e-ulfat mein mile aise bhi diwane mujhe

rāh-e-ulfat meñ mile aise bhī dīvāne mujhe

jo ma.āl-e-dostī aa.e the samjhāne mujhe

ishq kī halkī sī pahlī aañch hī meñ jal bujhe

kyā bhalā dard-e-vafā deñge ye parvāne mujhe

ye to kahiye be-ḳhudī se mil ga.ī kuchh āgahī

varna dhokā de diyā thā chashm-e-bīnā ne mujhe

nā-murādī luuT hī letī matā-e-ārzū

ik sahārā de diyā ehsās-e-fardā ne mujhe

kis se kahtā dil kī bāteñ kis se suntā un kā raaz

bazm meñ to sab nazar aate haiñ begāne mujhe

tauba tauba nā-ummīdī kī ḳhayāl-ārā.iyāñ

dekhte hoñ jaise ḳhud lalchā ke paimāne mujhe

merā ik adnā sā partav hai nizām-e-kā.enāt

kyā samajh rakkhā hai is mahdūd duniyā ne mujhe

jab kabhī dekhā hai ai 'zaidī' nigāh-e-ġhaur se

har haqīqat meñ mile haiñ chand afsāne mujhe

rah-e-ulfat mein mile aise bhi diwane mujhe

jo maal-e-dosti aae the samjhane mujhe

ishq ki halki si pahli aanch hi mein jal bujhe

kya bhala dard-e-wafa denge ye parwane mujhe

ye to kahiye be-KHudi se mil gai kuchh aagahi

warna dhoka de diya tha chashm-e-bina ne mujhe

na-muradi luT hi leti mata-e-arzu

ek sahaara de diya ehsas-e-farda ne mujhe

kis se kahta dil ki baaten kis se sunta un ka raaz

bazm mein to sab nazar aate hain begane mujhe

tauba tauba na-ummidi ki KHayal-araiyan

dekhte hon jaise KHud lalcha ke paimane mujhe

mera ek adna sa partaw hai nizam-e-kaenat

kya samajh rakkha hai is mahdud duniya ne mujhe

jab kabhi dekha hai ai 'zaidi' nigah-e-ghaur se

har haqiqat mein mile hain chand afsane mujhe