rah-e-ulfat mein rakhe jab the qadam yaad hai kuchh

rāh-e-ulfat meñ rakhe jab the qadam yaad hai kuchh

baaz aa.e the kabhī aap na ham yaad hai kuchh

kaise ik duuje ke ham aib chhupā rakhte the

pārsā yuuñ to kabhī tum the na ham yaad hai kuchh

hosh meñ rah ke bhī mad.hosh bane phirte the

ham tirī āñkhoñ kā rakhte the bharam yaad hai kuchh

mo'taqid jab nahīñ hote the vafā ke ham tum

na koī dard na kuchh ranj-o-alam yaad hai kuchh

mas.ala jhuuT ko sach karne kā jab aaya kabhī

tum ne khaa.ī thī mire sar kī qasam yaad hai kuchh

rah-e-ulfat mein rakhe jab the qadam yaad hai kuchh

baz aae the kabhi aap na hum yaad hai kuchh

kaise ek duje ke hum aib chhupa rakhte the

parsa yun to kabhi tum the na hum yaad hai kuchh

hosh mein rah ke bhi madhosh bane phirte the

hum teri aankhon ka rakhte the bharam yaad hai kuchh

mo'taqid jab nahin hote the wafa ke hum tum

na koi dard na kuchh ranj-o-alam yaad hai kuchh

masala jhuT ko sach karne ka jab aaya kabhi

tum ne khai thi mere sar ki qasam yaad hai kuchh