rah jine ki batao to koi baat bane

raah jiine kī batāo to koī baat bane

hausla dil kā baḌhāo to koī baat bane

sirf iz.hār-e-mohabbat se nahīñ kaam chale

haañ agar saath nibhāo to koī baat bane

duur se dīda-e-ummīd ko tarsāte ho

jab mujhe paas bulāo to koī baat bane

na karo duur se dāvā-e-masīhā.ī tum

mujh se murde ko jilāo to koī baat bane

ġhairiyat ab bhī numāyāñ hai zarā rahm karo

tum mujhe apnā banāo to koī baat bane

mo.āmla dil kā batāne meñ pas-o-pesh hai kyā

parda-e-sharm uThāo to koī baat bane

kyoñ sunāte ho mujhe qissa-e-dard-e-hijrāñ

pyaar ke giit sunāo to koī baat bane

aañkh se aañkh milāte ho bhalā 'ahqar' se

dil ko dil se jo milāo to koī baat bane

rah jine ki batao to koi baat bane

hausla dil ka baDhao to koi baat bane

sirf izhaar-e-mohabbat se nahin kaam chale

han agar sath nibhao to koi baat bane

dur se dida-e-ummid ko tarsate ho

jab mujhe pas bulao to koi baat bane

na karo dur se dawa-e-masihai tum

mujh se murde ko jilao to koi baat bane

ghairiyat ab bhi numayan hai zara rahm karo

tum mujhe apna banao to koi baat bane

moamla dil ka batane mein pas-o-pesh hai kya

parda-e-sharm uThao to koi baat bane

kyon sunate ho mujhe qissa-e-dard-e-hijran

pyar ke git sunao to koi baat bane

aankh se aankh milate ho bhala 'ahqar' se

dil ko dil se jo milao to koi baat bane